برافو ياحكومه
12:17 ص
El_Tahan
الحكومه اه ياحكومه هتعملى ايه تانى فينا ياحكومه مش عارف اضحك ابكى افرح ارغى ارغى احسن بصوا انا كنت لسه بتكلم فى الموضوع اللى هكلمكوا فيه دلوقت مع ناس كبيره ناس واخده خبره من الحياه خبره التكيف مع العيشه فى مصر بس ماحدش فدنى بس يارب تفيدونى انتو اتمنى كده الموضوع اللى انا هتكلم فيه بعيد عن السامعين هو الضرايب العقاريه خدنا ايه منك ياحكومه عشان ندفع لك ضرايب على راى عمرو الليثى اهو ده اللى ناقص كان فيه كاريكاتير عامله مصطفى حسين كان نظيف واقف مع الريس فالريس بيقول لنظيف شوف الهوا جاى حلو ورايق ازاى قاله لو عايزنا ياريس نفرض عليهم ضرايب ع الهوا من بكره الصبح نفرض عليهم ههههههه مافضلشى غيرهم ياحكومه الهوا والميه وربنا يستر فى الايام الجايه اقلكوا باه الحوار دار مابينا ازاى مع الناس الكبيره دى وانا شاب والحماس وخدنى شويه واحد قال والله الحكومه فاضيه كل مايلاقو نفسهم فاضيين يروحو مطلعين قرار جديد واخرتها الضريبه العقاريه واحد رد عليه قاله هنعمل ايه هما اللى ماسكين البلد رد عليه قاله المفروض ياخدو من الغنى بس رد عليه قاله ازاى هى الحكومه بتيجى الا ع الفقير الغلبان رد عليه قاله دول ممكن يفرضوها ع الفقير بس ومايفرضوهاش ع الغنى وانا فى الحوار ده كله قاعد مستمع عنيا تروح لده شويه ولده شويه ولقيت الناس مستسلمه خااااالص روحت انا قايل ايه طيب ياجماعه دلوقتى احنا ممكن مانقدمش الاقرارات دى ونبقى احنا الكسبانين لقيت واحد رد عليا وصوته بدا يرفع كده ويقولى ماينفعش ازاى دانت تتبهدل قلت له دلوقتى لو تمانيين مليون مواطن ماقدموش الاقرار ده ايه اللى هيحصل؟؟الاقى واحد من القعده يرد عليا ويقولى ازاى دى الحكومه ياعم انت بتهزر انت اللى الحماس وخدك حبتين تعالى اركن جنبى هنا وقول حاجه مفيده فقلت له دانتو اللى بتهزروا والله لما نفضل ساكتين لحد الدرجه دى امال هنتكلم امته ماعندها حق الحكومه تركبنا ماحنا اللى عايزين كده يقولى انت عارف اللى انت بتتكلم عنه ده ايه ؟ اقوله ايه! يقولى انت عايز تقلب نظام البلد ياعم مايتقلب ولا يولع احنا لازم حقوقنا ناخدها وبعدين لازم ندور على مصلحتنا شويه دلوقتى اتفررض علينا نظام مش قابلينه يبقى العقل بيقول اننا لازم نعترض واحد يقولى انت مش من هنا ياكابتن ت ايه قلت له نعترض مش اعترض قالى يابنى انت فاهم بلدنا غلط انت مش عارف حاجه قلت له بكل جراءه ليه يعنى ايه اللى هيحصل لو كلنا بقينا يد واحده ووقفنا ادام حاجه زى دى كلنا مانقدمش الاقرار وناخد خطوه جريئه كده قالى ومين اللى هيقف معاك كله بيقول يلا نفسى رديت عليه قلت يبقى احنا اللى خدنا اننا نضرب على قفانا احنا اللى عايزين نبقى كده وبعدين ماهو لازم كده من اعمالنا لازم ربنا يسلط علينا خلقه لازم نشوف الهم ونسكت كده فواحد حكالى قصه كده اقنعتنى صراحه قالى بص الفقير مايعرفش يعمل حاجه فى البلد دى قالى كان فيه قصه زمان اتحكت لنا ايه هى ان كلب واحد غنى عض راجل فقير ام ايه الفقرا وقفو مع الراجل الفقير ده وقالو له لازم ترفع قضيه ده الكلب عضك فى ايدك وعاملك ساعه اهوه قال ياجماعه المسامح كريم قالو له لا لازم ترفع قضيه واحنا معاك وبتاع المهم الراجل سمع الكلام وفعلا رفع قضيه ويوم المحكمه حضر الفقير والغنى فالغنى كان معاه ييجى عشر محامين ومحامين ايه جهابز يعنى مستشارين قدروا المستشارين دول يثبتوا ان الراجل هو اللى عض الكلب ولازم يدفع تعويض ويجيب حق الساعه اللى الراجل خدها من الكلب هههههههههههههههه دنيا لها العجب هو ده اللى بيحصل دلوقتى معاك سلطه دوس عالتخين والرفيع اقتنعت بس لسه ماقتنعتش اوى قلت يعنى الواحد يوم مايحب يعترض فى البلد دى يعمل ايه رد عليا وقلى ابقى خد لك جنب وعبر براحتك محدش هيقولك حاجه قلت هى بقت كده ماشى ياحكومه من النهارده مفيش حكومه انا الحكومه انا الحكومه لقيت الراجل اللى كان قاعد جنبى اللى وشه الطيب الامير اتغير ولقيته بيقولى انت بتشتم فى الحكومه ياض طلع مخبر هههههههه قولتله انا قطع لسانى انا اقدر اشتم فى الحكومه حكومه ايه اللى اشتم فيها دى مهنيانا ومنغنغانا هنشتمها ليه باه احنا كل حاجه شايفنها حلوه وبعدين ماشوفناش منها حاجه وحشه عشان نشتمها ربنا يخلى لنا الحكومه وافتكرت كلام عادل امام فى مسرحيه الزعيم وفضلت اقول اللهم بطخه اللهم فلفله وجزرله وخيرله واديله سلطات على اد نيته وانتظرونى قريبا فى بوست جديد وبرافو ياحكومه .
