حوار مع عقلى الباطن
2:02 ص
El_Tahan
ابداها باسم الله
كنت قاعد فاضى كده ماليش لازمه قلت اكتب موضوع كده فكرت فيه بسرعه وانا قاعد ايه هو باه الهلوسه بينى وبين عقلى الباطن يعنى احكيلكو حوار حصل بينى وبينه مره كنت نايم فى امانه الله بس لسه ماتعمقتش فى النوم الاقيه يصحينى ويقولى
صلاح: انت عملت ايه مفيد النهارده
انا عارفه رخم قلت له مالكش دعوه انا اصلا مفيش بينى وبينه عمار مش بنتفق على شئ واحد ابدا المهم قالى
صلاح:انت بتهزر ايه اللى انت بتقوله ده ماتقوم تذاكرلك شويه اقوله ياعم مذاكره ايه دلوقتى الساعه اتنين بليل انت هتهزر الاقيه بغلاسته يقولى ايه يعنى قوم ذاكر انت هتضيع اقوله يعنى انا لما اذاكر دلوقتى هطلع من الاوائل انت هتشتغلنى يقولى ممكن فعلا تبقى من الاوائل وتبقى مثل مشرف فى مصر واحتمال تبقى مثل مشرف فى العالم كله اقوله ياعم انت هتشتغلنى انت وصلتنى للعالميه وانا نايم امشى من ادامى دلوقتى الاقى الغلس يقولى هتفضل طول عمرك كده كسول مش انت اللى قلت فى يوم من الايام عايز ابقى حاجه اقوله حصل بس حبكت تيجى وانا نايم تقولى مثل وكلام فارغ من ده الاقى الغتت يقولى انت لازم تكون جاهز فى اى وقت اقوله حاضر طيب بس انا عندى كليه الصبح وبعدين سبنى الحق اناملى شويه عشان الساعه بقت تلاته وابقى مفوق فى الكليه الاقيه يقولى انت يالا بليد كده ليه اصحى اعمل حاجه الاقيه عايز يخرج لموضوع تانى يقولى طيب انت صليت النهارده اقوله اه صليت الخمس صلوات الحمد لله يقولى فرض ولا جماعه اقوله كده وكده يقولى طيب مش حرام عليك تضيع منك سبعه وعشرين درجه اقوله خلاص اتعلمت وبعد كده هصل الخمس صلوات فى الجماعه الاقيه يقولى بس انت بتسافر وبتتعب اقوله يعنى ايه يقولى يعنى انت مش هتنفذ اللى انت بتقوله قلتله لا انا راجل واد كلمتى الاقى الغلس برضه مش عايز يحل عن سمايا ياعم ياعم ابوس ايدك سبنى انام الساعه بقت اربعه هنام تلت ساعات بس يقولى الله انت مستقل تلت ساعات ده التلت ساعات دول بيتغير فيه معدل وفيات ومواليد ودنيا كبيره اقوله والمطلوب يقولى انت مش عاجبك كلامى اقوله بسراحه كلامك خنيق الاقيه يقولى كده وانا اللى كنت زمان بنصحك واقولك ذاكر الحته الفلانيه تلاقيها جايه فى الامتحان تانى يوم اقوله اه فاكر فاكر يوم ماصحتنى فى امتحان تانيه ثانوى وقلتلى ان العصر العباسى التانى جاى قمت ذاكرته رحت مالقيتش عباسى خالص من يومها اصلا وانا مش بثق فيك يقولى انت مش حلو لولايا كان زمانك مالكش لازمه قلتله مانا كده فعلا جبت ايه جديد يقولى لا انت باش مهندس محترم اقوله طيب سبنى انام الساعه بقت خمسه الله يخرب بيتك انا عايز انام وصاحبنا ده معندوش دم انه يحل عن سمايا لا المهم قلت لنفسى خلاص سيبك منه وركز فى النوم ركزت كده جامد وسبتنى من موضوع الهواجس ده يادوب هى دقيقه ماستحملش لاقيته بيقولى هاه نمت اقوله الله يحرقك ياشيخ انت مابتزهاش طلعنى من تركيزى تانى اقوله ياعم ابوس ايدك سبنى انام يقولى الله انت بتزعأ ليه انا ماسكك اقوله مانا اللى استاهل ضرب الجزم يقولى صلاح انت ماتستاهلش ضرب الجزم ولا حاجه انت حبيبى اقوله انت جنسك ايه يااخى انت طالع غلس لمين يقولى من كتر قعدتى معاك اقوله انا غلس يقولى اه افتح الموبايل الاقى الساعه عامله كم الاقيها خمسه اقوله ماشى انا هسيبك مع نفسك وشوف هترغى مع مين واقوم اصلى الفجر وابقى قابلنى يقولى هتقوم تبل وشك ومش هتعرف تنام دانت محتاج الربع ساعه نوم ابن الذين كلامه مقنع بيقنعنى بطريقه غريبه اقوله طيب اسكت باه سبنى انام ماشى يقولى حاضر هسكت خلاص بس انت ماتباش تزعالى تانى اقوله حاضر عمرى ماعدت هزعالك تانى دانت حبيبى الاقيه يسكت شويه عبال مايخلصو صلاه ويضيعها عليا ابن الجزمه ويرجع يقولى ايه انت عارف الجو بارد اوى اقوله والله مافى ابرد منك يقولى انت بتشتمنى اقوله ياعم ارحمنى ارحمنى اقوم انام فى اوضه تانيه يعنى واسيب لك الدنيا كلها يقولى لا ماتسبنيش اقوله طيب اهدى باه ماشى الساعه بقت سته خلاص بقى سبنى انام ساعتين كده عشان اعرف افتح عينى الصبح ع الاقل يعنى يقولى انت اصلا لو نمت دلوقتى مش هتقوم قوم اسهر الشويه دول وطبق اليومين وخلاص اقوله لا سبنى انا هنام وهعاير المنبه اهوه ع الساعه تمانيه وهو يصحينى يقولى هوانت بتسمعه اصلا لما تكون نايم بدرى فما بالم لما تكون نايم متاخر اقوله مالكش دعوه واكسفه كعادته بس خلاص الساعه بقت سبعه اقوله بص باه سبنى الساعه دى ينوبك صواب انا تعبت يقولى خلاص هسيبك عشان تلحق محاضراتك الصبح قال يعنى حريص على مصلحتى هنا باه بيسيبنى انام بس ابن الذين بعد ماكان بيصحينى عشان يغلس الاقيه يسيبنى اخد راحتى فى النوم خاااااااااااااااااااالص اقوم من النوم الاقى الساعه كم تلاته العصر اوبااااااا كده ماحضرتش حاجه النهارده ولا استفدت من اليوم ياخسااااااااره هقول ايه حد يقولى ده يتعامل ازاى؟؟ واللى عايز ياخده يقولى وانا ابعتهوله بصراحه انا قرفان منه ودايما مش بنتفق على حاجه نفضل نتناقش كده من غير استفاده ع الفاضى يعنى بيعطلنى وخلاص بس ان شاء الله هحاول اتغلب عليه ادعولى.
أحيانا بيطلعلى ابن اللذين ده, وبيقعد على دماغى برضه
بس انت كتبتها باسلوب لذيذ اوووى
الحوار مع انه طويل بس شدنى انى اكلمه للآخر
ابقى خد منوم بقى علشان تعرف تنام بتركيز :)
السلام عليكم
انا لو من حضرتك كنت رميته في الشارع
هههههههههههههههههههه
جزاكم الله خير
السلام عليكم
حوار جميل
ولكن لابد ان تنتصر عليه فى الاخر ان شاء الله
قبل ما تنام قل" قل هوالله احد-وقل اعوذ برب الناس وقل اعوذ برب الفلق- الفاتحه "
وان شاء الله ما يغلس عليك تانى
وفقك الله لما يحبه ويرضاه
دا غير يوم البلاي ستيشن اللى قعدنا عليه لسبعه الصبح يا صلاح ؟
سجود
انتى رايك كده خلاص المره للى جايا هرميه واقوله ان سجود اللى قايلالى وهخليه يجيلك هههههههههههه
المجاهد الصغير
ان شاء الله هحاول انتصر عليه بس انتى شايفه هو غلس اد ايه والله بقرا كل ده فعلا بس مش عارف فيه ايه ميرسى ع النصيحه الغاليه
تشى
لا ده غيره خالص هههههههههههه
انا كنت يوم بلاى استيشن لسبعه ويوم معاه لسبعه برضه ههههههههههه
السلام عليكم
كل عام وأنت بخير بمناسبة
بدايةعام هجرى جديد
وقبل النوم تقرأ
بسم الله الذى لايضر مع
إسمه شيئاً فى الأرض ولا فى
السماء وهو السميع العليم
وإن شاء الله لن يأتى إليك مرة أخرى
خالص تقديرى
انا عجبنى اوى الحوار
واحلى حاجه اللى باللون الاحمر اقوله ويقولى اقوله ويقولى
ابقى قول الاذكار قبل ما تنام ربنا يحفظك يا رب
تحياتى ليك ومدونتك جميله ولذيذه
hhhhhhhhhhhhhhhhh walla funny